Señardaes (asturianu)
La nueche texérase como una sucesión de desvelos, unu a cada movimientu de la so compañera de colchón. Yeren los nueve de la mañana. Desapegó los párpagos y, al traviés de la untuosa ranura, aldovinó la figura magriza de Lucía. Trató d'asitiase. Fexes de lluz saltarino afayaben cuévanos y riegos azarosamente. Consiguió enfocar la mirada, ende taben los sos llabios sedar y tienru. Un pocu más llueñe, los sos pupiles acebache. Lucía retorcíase llevemente abandonando'l suañu, ensin mediar palabra. Lola dio-y la llombu intencionadamente, porque sabe que, más próxima de la naturaleza que de la oratoria, Lucía arrodia la so cintura y tresmítelu corpóreamente lo que nun se dexa espresar con pallabres. Nun volvió sumir, quedóse asina, protexía.
Al otru llau del cristal les nubes pasaben en dirección única, con una lletanía estelante. Honestamente, Lola nun supo atopar culpables, anque si detuviérase a pensalo un pocu más, de xuru se señalaría a sí mesma. ¿Fuera'l cielu color pavimentu l'encargáu de desatapar los sos fuexos insatisfechos? Sentía que los fexes de lluz saltarino tamién espunxeren el so interior inerte.
Los balcones saludaben ximelgando les sos sábanes moyaes, les toballes con golor a xazmín. Mentanto ella, nun podía dexar de pensar na so totalidá, hasta resultase despreciablemente inabarcable. Montes de ropa usao cercaben l'apaciguadura en que los brazos de Lucía la punteaben. Magma encesu fora de sí, y tamién brotar dientro, tou resolvíase aportunante.
Últimamente hai pocu tiempu, piensa. Consúmese como la mecha d'una vela, anubriendo la estancia de la esencia más melosa hasta sumir. Lola nun puede soportalo, quier esplegase y contenelo tou, por una vegada, de forma estática. Sicasí, toles cintes de colores esmúcense ente los sos deos. Contempla, cola córnea cristalina, un fotomontaxe qu'alteria'l filme orixinal. Cubrir con un filtru sepia, afatáu con violinos y dulzura, pa torturar al so corazón que se resiente maleable como plastilina. Nin l'orde cronolóxicu nin los diálogos de la hestoria análoga atopen fidelidá na so "basada en fechos reales".
Lola quixo enferronase como unu cachiparru a la melena rubia que-y cubría los costazos. Dempués quixo escapar a la so casa nel Norte, como si ellí hubiera de realcontrase col pasáu pa entamalo o restauralo. Lucía decidió que yera momentu de llevantase y la congoxa quebró los azulexos con cenefes tintaes de Lola, pola brusquedá que la traxo de vuelta al presente. Unos segundos d'aceleración. Ensertar nel barullu. Ana entraba y salía de les distintes habitaciones, con aires de ponese en movimientu faía yá unes cuantes hores. María y Mario teníen demasiada enerxía nel cuerpu pa tar faciéndose conscientes de la cantidá de cerveces que s'habíen tomáu.
Fueron al supermercáu, dexando al so pasu un cercu de golor a cuerpu cansáu y piel consumida. Llargues coles distribuyíense pol espaciu nun ordenáu aruelu de pitíos y bolses de plásticu. A Lola siempres-y gustara pasar al pie de les neveres que marmullen y enfresquen la cara. Recordáben-y a les tardes de branu en que, al cerrar la piscina municipal, les sos amigues o la so novia acompañábenla a por batíos de chocolate.
Cuatro axentes de la policía nacional entraron al establecimientu mientres Lucía averaba la tarxeta de creitu al llector magnéticu. Al paecer, un home precisaba ser amenorgáu poles fuerces del orde al completu, porque o bien taba comiéndose un paquete de galletes ensin pagar, o s'echara demasiao arume del probador. Al salir del supermercáu, cruciáronse con una muyer que-y dicía a la so fía: <<El policía saludóte, ¡cuántos amigos policías tienes!>>
A un camareru cayérase-y la caña de cerveza al sofitala sobro la mesa de latón y volvía bayeta en mano enoxáu consigo mesmu. Nos balcones había muyeres, siempres muyeres, cuspiendo fumu y solmenando les migues de los manteles. Dalgunos remexaben l'agua que, teóricamente, tenía de cayer sobro los tiestos.
De vuelta en casa almorzaron tostas de tomate y aceite, de primeres acompañaes, dempués a soles. Lola diba dise, pa nun ser una estobisa, pero Lucía mentó qu'estimaba la compañía, asina qu'esfrutó de la so presencia cola conciencia más sele. Lola tenía esi problema, nun quería resultar cafiacu, quería tar tan solo cuando tenía de tar. A la fin siempres s'atopaba a sigo mesma n'estáu d'alerta. Si cualesquier pudiera enfusar na so mente, afayaría un treme de cadenes y murios que, de cara pa escontra fora, pintábala como daquién perfectamente correcta, apropiada, oportuna, estable. Internamente, caltenía una llucha constante contra natura. Yera traumáticu, doliosu como la hestoria de la humanidá. La sinopsis de la so vida podría rezar daqué como: un duelu por apoderase a sigo mesma.
Lucía retúvola poconín, con un abrazu, cuando dixo que tenía de dise. Entá queriendo despintalo, a Lola fízola fondamente feliz. Aquel ser presa, unos minutos, d'otra y non de sí, d'una otra deseyada, quería y almirada, fizo que los sos músculos se relaxaren. Asina asocedía cada vez que la muyer rubia como la selva daba a entender que la quería consigo nesi intre. Como sabía que nun podía pone-y pinces a esa falda nun s'esperaba nada, y cuando s'asomaba y el vientu nun la llevara entá, allegrábase no más sincero del so sentir. Beso-y na boca, mordió-y los costazos, les oreyes, el pescuezu y alendólu al escuchu erizándole la piel. Tez clara aportó sonrosada cola proximidá de la so cuspia, y el mugor pegóse-yos al cuerpu tresformándoles en chorna.
Rindida sobro Lucía, atesoró una nueva alcordanza, nesa arca del pasáu que se volvía demasiao pesáu como pa soportalo más. Cada vez que s'afayaba pensando asina, fustigábase por ingrata, por vanidosa y egocéntrica. Nada nes sos propies carnes paecía-y de gravedá, o más bien, nun s'otorgaba la potestá de que-y lo paeciera. La culpa escomíala per dientro, escontra toos, escontra la so propia esistencia, y sentía que faía tantu mal con cada actu que se movía ente la busca d'una expiación posible, y la posibilidá de victimizase siempres, creyéndose podrén. Fora como fora, despreciaba dambes opciones.